മുതലാളിത്വ ശക്തികള്‍ അദൃശ്യ കരങ്ങള്‍കൊണ്ടു മൂന്നാം ലോകരാഷ്ട്രങ്ങളെ സാമ്പത്തികമായി ചൂഷണം ചെയ്യുമെന്നു റഷ്യ ഭീഷിണിപ്പെടുത്തി. ഇത്തരത്തിലുള്ള റഷ്യയുടെ വിലകുറഞ്ഞ വാദഗതികള്‍ക്ക് പടിഞ്ഞാറൻ രാജ്യങ്ങളിലും മൂന്നാം ലോകരാജ്യങ്ങളിലും സ്വീകര്‍ത്താക്കൾ ഉണ്ടായിരുന്നു. വിയറ്റ്നാം യുദ്ധത്തിൽ അമേരിക്കയുടെ പങ്കിനെ ലോകരാഷ്ട്രങ്ങളുടെ മേലുള്ള സാമ്രാജ്യ ശക്തികളുടെ കടന്നുകയറ്റമായി വ്യാഖ്യാനിക്കപ്പെട്ടു. ബ്രിട്ടീഷ് ചിന്തകനായ ബര്‍ട്രാന്‍റ് റസ്സലിനെ പോലുള്ള പ്രഗല്‍ഭര്‍ ഇതേ വാദഗതിയുമായി മുന്നോട്ട് വന്നു. ലോകത്തെവിടെയൊക്കെ മനുഷ്യര്‍ ചൂഷണത്തിനും, വിശപ്പിനും ഇരയാകുന്നുണ്ടോ അതേ ഇടങ്ങളിലെല്ലാം തന്നെ അമേരിക്കയുടെ അദൃശ്യ കരങ്ങൾ പിന്തുണ കൊടുക്കുന്നു എന്ന് റസ്സൽ പ്രഖ്യാപിച്ചു. ലോകരാഷ്ട്രങ്ങളുടെ മേൽ അമേരിക്കൻ നേതൃത്വത്തിൽ സാമ്രാജ്യ ശക്തികള്‍ കടന്നുകയറുന്നു എന്നും അദ്ദേഹം ആരോപിച്ചു. തങ്ങളുടെ സ്വാസ്തിക താത്പര്യങ്ങള്‍ക്ക് മേലെ കടന്നുകയറാൻ ഒരു ശക്തിയെയും അനുവദിക്കില്ലെന്നുള്ള അമേരിക്കന്‍ നയത്തിന്‍റെ അനന്തര ഫലമായി വിയറ്റ്നാം യുദ്ധത്തെ റസ്സൽ വ്യാഖ്യാനിച്ചു കാണിച്ചു.
വിയറ്റ്നാം യുദ്ധത്തിന് മുന്‍പുവരെ പടിഞ്ഞാറൻ രാജ്യങ്ങളില്‍നിന്നുള്ള സാമ്രാജ്യത്വ വിമര്‍ശകര്‍ എന്നുള്ള വിഭാഗം, ചില ഇടതുപക്ഷ ബുദ്ധിജീവികളും, ചിന്തകന്മാരും മാത്രമായിരുന്നു. പക്ഷേ വിയറ്റ്നാം യുദ്ധത്തോടുകൂടി ഈ ബുദ്ധിജീവികള്‍ എന്ന് അവകാശപ്പെടുന്നവരുടെ വാദങ്ങള്‍ക്ക് കൂടുതൽ പിന്തുണ ലഭിച്ചു. ബില്‍ വാറനെപ്പോലുള്ള കമ്മ്യൂണിസ്റ്റ് നേതാക്കൾ അമേരിക്കയുടെ വിയറ്റ്നാം ഇടപെടലിനെ “ഈ കാലഘട്ടത്തിലെ ഏറ്റവും ആപത്കരമായ രാഷ്ട്രീയ അധിനിവേശ സിദ്ധാന്തമായി” മുദ്രകുത്തി വിമര്‍ശിച്ചു. നിയോ- കൊളോണിയലിസം എന്ന ആശയം മേല്പറഞ്ഞ വസ്തുതകളെ അടിസ്ഥാനമാക്കി കമ്മ്യൂണിസ്റ്റ് സൈദ്ധാന്തികന്‍മാര്‍ രൂപപ്പെടുത്തിയെടുത്തു. കമ്മ്യൂണിസ്റ്റ്, ലോകത്തിലെ മാര്‍ക്സിസ്റ്റ് വിശ്വാസികൾ മാത്രമായിരുന്നില്ല ഈ സിദ്ധാന്തത്തിന്‍റെ അടിമകള്‍. ലാറ്റിനമേരിക്കയിലെ ദശലക്ഷക്കണക്കിന് നഗരവാസികളും, ഏഷ്യൻ രാഷ്ട്രങ്ങളിലെ രാഷ്ട്രീയ അല്‍പ്പജ്ഞാനികളായ കർഷകരും , വ്യാവസായിക മുതലാളിത്ത രാജ്യങ്ങളിലെ ഉയർന്ന സാക്ഷരതയുള്ള പ്രൊഫഷണൽ തൊഴിലാളി വര്‍ഗ്ഗവും ഈ സിദ്ധാന്തത്തെ ഒരു ലോക വീക്ഷണമായി കണ്ടുകൊണ്ട് അതിന്‍റെ സ്വാധീനത്തിനടിമപ്പെട്ടു.
Comments
Post a Comment